„Самиот факт што во јавноста постои сомнеж дека некој од Владата тргува со правото и правдината, говори дека во оваа држава ниту има правда ниту има правдина, така што не би го коментирал сето она што во моментов се случува во РМ“. Ова е ставот на лидерот на опозициската ВМРО-ДПМНЕ, Христијан Мицкоски по гласините дека се преговара со пратениците од ВМРО-ДПМНЕ да гласаат за уставни измени, а во замена за тоа, експремиерот Никола Груевски да биде амнестиран.
Мицкоски повтори дека не барал амнестија за никого и дека власта лажно го обвинува, за како што вели, да ја дефокусира јавноста.
„Власта лажно ме обвинува дека сум барал општа амнестија и на тој начин сака да ме девалвира и да ги прикрие нивните криминални дејства. Ме обвинија дека сум ја условувал поддршката од пратениците со некаква амнестија. Ниту сум условувал, ниту уценувал било кого. Сите пратеници како и Владата имаат должност да ја следат волјата на граѓаните изразена на референдум“, додаде Мицкоски.
Вчера од власта преку некои медиуми излезе информација дека имаат шест пратеници од ВМРО-ДПМНЕ кои ќе гласаат за уставните измени. Според информации на А1он, засега се тројца. Двајца кои се согласиле се пратеници кои се обвинети за настаните од 27 април, а третиот пратеник исто обвинет , одбил да гласа. Неофицијално, на листата гласачи е и Владанка Авировиќ чиј син е обвинет од СЈО.
Екс лидерот на партијата, Никола Груевски во 3 часот по полноќ повика пратениците на ВМРО-ДПМНЕ да не попуштаат и дека не смее да паднат под заканите и притисокот.