Претседателот на ВМРО-ДПМНЕ Христијан Мицкоски денеска во Белград, заедно со потпретседателот на ВМРО-ДПМНЕ Александар Николоски и пратеникот и лидер на ДПСМ Иван Стоилковиќ оствари средба со Претседателот на Република Србија и лидер на СНС Александар Вучиќ.
На средбата се разговарало за продлабочена соработка на двете сестрински партии во рамките на Европската народна партија, европските перспективи и регионалната соработка информираат од ВМРО-ДПМНЕ.
Мицкоски посочил дека потребно е регионот конечно да направи сериозен чекор во однос на борбата и потрагата за подобар живот и посреќни граѓани. Иднината на регионот не е во градење на ѕидови, туку мостови кои ќе донесат подобар и побогат живот за сите, истакнал Мицкоски посочувајќи дека европското интегрирање треба да биде акцелератор на тие процеси.
Вучиќ даде поддршка на позициите за развој на соработката и продлабочено пријателство, како и иницијативата “мини шенген” која не смее да се гледа како алтернатива на Европската Унија туку како на начин на премостување на бариерите и развој на државите.
