Пратеничката група на ВМРО-ДПМНЕ утре во Собранието ќе поднесе барање за оставка на Заев, формирање техничка влада и иницијатива за распуштање на парламентот, најави лидерот на опозициската партија Христијан Мицкоски по седниците на Извршниот и Централниот комитет на ВМРО-ДПМНЕ.
– Велеа дека сме барале избори, а сме молеле Бога да не добиеме. Нека видат сега граѓаните кој е за, а кој моли Бога да не ги добие, рече Мицкоски.
Тој го повтори ставот на ВМРО-ДПМНЕ дека државата не била досега вака поделена и дека Македонија е во најтешка ситуација по осамостојувањето.
– Да го спречиме пеколниот план за уништување на Македонија, има време и за реформи и за корекции, додаде Мицкоски.
Во случај да не биде прифатено барањето за избори, Мицкоски немаше прецизен одговор што ќе преземе ВМРО-ДПМНЕ.
Галена Николовска-Ризвановиќ