ДУИ не излегува од Владата. Многумина тоа и го чекаат, за да им се отвори место на нив, но ДУИ нема таква намера, Ермира Мехмети Деваја, во интервју за „Журнал“, го соопшти јасно ставот на коалицискиот партнер на ВМРО-ДПМНЕ.
„Некој друг може да очекува ДУИ да ја напушти Владата и да се оди на предвремени избори. Не сме подготвени ниту заинтересирани да направиме место за игра на другите, но ќе го направиме она што е нашата политика и е во согласност со очекувањата на албански електорат, а не само на гласачите на ДУИ“, вели Мехмети Деваја.
„Ова не е моментот кога треба да се бара ДУИ да ја напушти Владата, што ќе значи одобрување на овој закон, а тоа не зависи од функционирањето на владата, бидејќи ова е предлог кој доаѓа од пратеничка група и што е уште поважно е предлог закон кој ја има поддршката од македонската опозиција. Во оваа ситуација недостиг на единство на Албанците ќе значи олеснување на институциите да го одобрат законот“, вели Мехмети Деваја.
Донесувањето на законот за бранители, онака како што е предложен од ВМРО-ДПМНЕ, вели, може да доведе до политичка нестабилност, до закана за постоењето на владата и на институциите, како што ги знаеме, но и нестабилност во односите меѓу Македонците и Албанците, вели Ермира Мехмети Деваја .
За ДУИ овој закон е нивната црвена линија, и значајно е она што ќе го направат етничките Македонци.
„Тука не станува збор само за ВМРО-ДПМНЕ како предлагач на законот, бидејќи тие едноставно немаат доволно гласови за да помине законот. Тука зборуваме за етнички блок, во кој спаѓа и опозициската СДСМ која се промовира како умерена, про рамковна партија, за мирен соживот и етничка доверба, а всушност, токму тие ќе ги обезбедат гласовите за донесување на овој закон“, вели Мехмети Деваја.