Во врска со вчерашниот немил настан, во кој физички беше нападнат претседателот на Либерално демократската партија и пратеник во македонското Собрание Горан Милевски, со свои реакции се огласиле и меѓународните организации во кои членува ЛДП и притоа изразиле загриженост за настанот.
На настанот, како што информираат од ЛДП, меѓудругите реагирал и Ханс Ван Баален, претседател на АЛДЕ (Алијансата на либерали и демократи за Европа) и пратеник во Европскиот Парламент.
– Најостро го осудувам кукавичкиот напад врз лидерот на Либерално демократска партија, Горан Милевски. Политичките сили во Македонија треба јавно да ја осудат употребата на насилство за изразување на политичко несогласување, рекол Ван Баален.
Со реакција се јавиле и пратеникот во Европскиот парламент и потпретседател на АЛДЕ, Илхан Кочук и Роман Јакиќ, претседателот на Либсеен (Либерална мрежа на Југоисточна Европа).