Во светот денеска се одбележува Меѓународниот ден на исчезнати деца, воведен во 1983 година во знак на сеќавање на децата кои се исчезнати и на тие кои се повторно вратени кај своите семејства. Целта е да се подигне свеста за овој глобален проблем.
Првата детска амбасада „Меѓаши“ соопшти дека според проценките на Интернационалниот центар за исчезнати и киднапирани деца, секоја година во светот исчезнуваат најмалку осум милиони деца годишно или 22 илјади дневно.
– Исчезнувањето и киднапирањето деца прерасна во секојдневен проблем со кој се соочуваат сите земји и на кој треба да му се посвети особено внимание од страна на претставниците на законот и на владите ширум светот. За жал, многу земји овој проблем не го сметаат за приоритет и немаат развиено соодветни механизми за пронаоѓање на исчезнатите деца за кои постои висок ризик да бидат искористени за проституција, трговија со органи, питачење и други најтешки форми на злоупотреба на деца, соопшти „Меѓаши“.
Покрај поттикот земјите да развијат политики за заштита на децата, овој ден има цел да укаже и на подеднаквата важност децата да се научат како да се заштитат себеси и како и да се информираат за ризиците и опасностите што ги демнат.
– Република Македонија исто така се соочува со проблемот на исчезнати и киднапирани деца. На официјалната интернет страна на Министерството за внатрешни работи на Република Македонија во моментов има објавено фотографии и податоци на четири деца кои се водат како исчезнати, информира „Меѓаши“.
Детската амбасада почна интензивни активности и подготовки за хармонизација и добивање на европскиот број 116000 за заштита на исчезнати и киднапирани деца.
– Со добивањето и почетокот со работа на овој број сметаме дека ќе бидеме уште подостапни за децата и за нивните родители кои се соочуваат со ваков проблем. Така ќе можеме уште поактивно да се вклучиме во постапките за заштита на деца од киндапирање и исчезнување, да бидеме во функција на преземање активности за пронаоѓање и враќање на исчезнати деца, намалување на сите облици на злоупотреба на деца и нивниот труд, како и активности со цел за постојана заштита на правата на детето, наведува Првата детска амбасада „Меѓаши“.