Францускиот претседател Емануел Макрон на прес-конференцијата на Самитот на НАТО во Шпанија откри дека неговото претседателство нашло компромисно решение за преговарачката рамка за членство во ЕУ за Северна Македонија.
„Мислам дека најдовме компромисно решение“, рече тој на прес-конференција на самитот на НАТО во Шпанија.
Бугарскиот парламент и даде зелено светло на владата на 24 јуни да ја одобри преговарачката рамка за членство во Европската унија за Северна Македонија. Пратениците изгласаа да и се дозволи на владата да го укине своето вето по измените во рамковниот текст што ќе ги гарантира правата на Бугарите во земјата преку уставни измени и ќе го обврзе Скопје да одржува добри односи со Бугарија, но македонската влада не го прифаќа предлогот додека не се гарантираат со него јазикот и идентитетот на македонскиот народ.
Во меѓувреме до македонската влада преку МНР од француското претседателство пристигнал предлог со идеи кои се однесуваат на јавно изнесените позиции и ставови на владата.
„Ова претставува основа за отворање на широк консултативен процес најпрво во Владата и коалициските партнери, а потоа и со Претседателот на државата, со Парламентот и со опозицијата, како и со граѓанскиот сектор, експертската и севкупна јавност во земјата. Како што ветивме, одлуката за нашата иднина ќе ја донесеме заеднички, мериторно, согласно Стратешките интереси на земјата и на сите нејзини граѓани. Сакаме да упатиме благодарност до Претседателот Макрон и француското претседателство, за нивните напори да се надминат пречките и да се зачува европскиот кредибилитет на Балканот“, соопштија од владата.