Четворица планинари, претставници на Македонија, присуствуваа на меѓународен планинарски фестивал во Турција, а го искачија и врвот Ерџиес на 3.917 метри надморска височина, кој е изгаснат вулкан, а со снег е покриен преку целата година.
За ова денеска информираше Бранко Мојсов, долгогодишен планинар од Неготино.
– Меѓународниот планинарски фестивал беше на турскиот врв Улудаз на истоимената планина, висок 2.300 метри надморска височина, каде што има изобилство од бубамари и токму ним им е посветен самиот фестивал. Присутни беа околу 500 луѓе од повеќе држави, покрај домашни љубители на планините и ние, од Македонија, присуствуваа авантуристи од Косово, Иран и Азербејџан, соопшти Мојсов.
Македонија ја претставуваа Мојсов и негов колега планинар од Неготино, како и двајца планинари од скопскиот планинарски клуб „Шкупи”.
– Се работи за остар врв до кој и на крајот од јули стигнувате низ снег.
Потекнува од вулкан и зависно од тоа од каде го гледате, како да има ѓаволски глави. Затоа и го нарекуваат ѓаволски. Потребни се и алпинизам и качување по јаже, нешто што досега не сум го практикувал при моите планинарски акции. Осум часа се потребни за качување и 6 за назад. Самиот врв е чисто карпесто место што се одронува поради вулканскиот состав, рече Мојсов раскажувајќи за искачувањето на Ерџиес.