Македонско друштво „Илинден“ со седиште во Тирана го поздрави добивањето статус кандидат за членка во ЕУ на Република Албанија. Како што стои во соопштението добивањето на кандидатскиот статус е во полза на сите граѓани, бидејќи европската перспектива на Албанија е перспектива на иднината.
– Добивањето на кандидатскиот статус треба да ја охрабри албанската влада, парламент, и другите актери компетентни во областа на заштита на малцинствата да направат реални политики во полза на малцинствата, што ќе овозможи целосно исполнување на петтата препорака на Европската унија која што е поврзана со подобрување на човековите права и правата на малцинствата и ќе се гарантира повисоко ниво на третманот на малцинствата во Република Албанија, стои во соопштението на „Илинден“.
Македонско друштво „Илинден“ ги поддржува албанските институции во продолжување на реформите потребни за членство во ЕУ и ќе го даде својот придонес во исполнувањето на препораките на Европската комисија во однос на правата на малцинствата.