Застапникот на „Мерцедес- Бенз“ за Македонија, фирмата „Мак аутостар“ ДООЕЛ која стана позната по случајот на СЈО „Тенк“, од каде сега осудените Никола Груевски, Гордана Јанкулоска и Ѓоко Поповски противпрано го набавија мерцедесот ЕС600 Гард вреден 600 илјади евра го доби тендерот за сервисирање на возилата на Собранието на РМ, автомобил Мерцедес ЕС600 и комбе Мерцедес Вито.
Договорот е потпишан помеѓу генералниот секретар на Собранието, Цветанка Иванова и управителот на Мак аутостар Зоран Марковски кој беше сведок во „Тенк“ за кој се осудени експремиерот, поранешната министерка и заменик министерот за внатрешни работи.
Мак аутостар за само една година сервисирање на овие две возила ќе добие вкупно 354 илјади денари или околу 5 илјади евра. Одржувањето, сервисирањето и поправката на возилата во цената опфаќа автомеханичари, автоелектричари, автолимарски и автолакерски услуги кои ќе се вршат сукцесивно во завнисност од потребата на Собранието.
Понудата на операторот Мак аутостар, како што стои во договорот е избрана за најповолна согласно Одлуката за избор на најповолна понуда заведена под бројот 05-4314/2 од 23.08.2018 година донесена од генералниот секретар на Собранието.
„Мак аутостар“ исто така во јули оваа година го доби тендерот од Владата на РМ за сервисирање и на мерцедесот ЕС 600 Гард за кој се обвинети Груевски, Јанкулоска и Поповски, во вредност од 2 милиони денари или 32.500 евра.
Виктор Јованов