Поранешен министер во македонската влада денеска е лустриран од Комисјијата за верификација на фактите како соработник на службите.
Се работи за министер, кој претходно работел како професор во едно училиште, и кој бил сведок на одреден настан што сега се користи против него за да се прогласи како кодош.
Додека бил класен раководител во училиштето, полицијата следела и обработувала средношколци за национализам, поради тоа што пееле албански песни, имале дајриња, знамиња на Албанија. Полицијата упаднала во класот за да им ги одземе тетратките, книгите и заминала. Но после тоа, во полициска станица го викаат токму класниот раководител, а подоцна министер во македонската влада. Тој дал три изјави на барање на полицијата за три дена, и сега врз основа на тие изјави е прогласен за соработник на службите.
Чедомир Дамјановски, член на Комисијата за верификација на фактите за А1 вели дека овој човек е чист, и апсолутно нема никаква врска со соработник на службите.
„Тој бил очевидец, тој ништо не направил сам, тој бил класен раководител и се одзвал само на повикот на полицијата да даде изјава“.
Според Дамјановски за овој екс министер нема никаков материјал од УБК дека е соработник на службите, ниту пак други документи кои укажуваат на тоа.