Гостиварските локални власти апелираат до граѓаните за порационална употреба на водата за пиење. Поради високите температури и доаѓањето на печалбарите во родниот крај во наредните денови, препорачуваат дополнително да се внимава при користење на водата за пиење.
– Се молат граѓаните да не ја користат водата од водоснабдителниот систем за наводнување на нивите, зелените површини, дворовите, миењето возила, како би се овозможило сите корисници да имаат вода за пиење и за основните животни потреби. Општина Гостивар ги повикува граѓаните водата да ја користат рационално и само за потребите на домаќинствата, се наведува во соопштението на општина Гостивар.
Од локалната самопуправа наведуваат дека веќе се регистрирани случаи на недостиг од вода во некои населби и околните села.
Од Јавното претпријатие „Комуналец“ ја потврдија состојбата и дека недостиг на вода и слаб притисок во цевководите во одредени реони.
– Тоа е поради неконтролираната употреба. Проблемите ги предизвикуваат несовесни граѓани кои ја злоупотребуваат водата и наводнуваат тревници и бавчи. Затоа во текот на денот има недостиг, а преку ноќта снабдувањето се нормализира, истакна директорот на ЈП Комуналец, Мемедали Џафери.
Џафери очекува дека најавите за намалување на температурите и вранежи од дожд ќе ја ублажат состојбата со недостигот од вода за пиење Деновиве на корисниците им се испорачуваат и по 450 до 500 литри во секунда колку е и максималниот капацитет на водоводот.