На 28-та седница на Советот на општина Струмица која што ќе се одржи на 15.06.2015 година (понеделник) треба да биде донесена одлуката за определување локација за поставување спомен – обележје на загинатите пилоти од хеликоптерската единица на МВР. Спомен – обележјето се подига во чест на Драги Мицев, Марјан Трајковиќ, Тоде Орешков и Иљо Лопатички кои ги загубија животите во хеликоптерската несреќа која што се случи во јули минатата година.
Спомен – обележјето е дело на академскиот сликар и вајар од Струмица, Митко Тошев, кое како идејно решение беше понудено на распишаниот јавен конкурс за изработка на идеен проект.
Висината на споменикот заедно со постаментот ќе изнесува два метра кое според авторот ќе претставува достојно одбележување на нивната херојска големина. На споменикот ќе биде претставена последната и најголема херојска мисија на пилотите, спасување на градот Струмица од уште поголема трагедија и катастрофа. На истиот ќе биде претставен хеликоптерот под посебен дијагонален агол на свивање, а на долниот дел од скулптурата ќе биде претставен градот Струмица со својата карактеристика, ридот на Царевите кули, извајано тродимензионално со еден посебен карактеристичен фрагмент од градот под Царевите кули.
Спомен – обележјето на загинатите пилоти чини еден милион денари.