Пратеникот Борислав Крмов од Левица побара жените земјоделки да добијат платено породилно отсуство, бидејќи тие како индивидуални земјоделки се исклучени од Законот за здравствено осигурување.
„Овој закон ние го поднесовме на 6-ти април и речиси година дена стои заглавен. За жал во нашата држава само со притисок и пред избори работи се случуваат. Тргнувајќи од фактот дека правото на паричен надоместок за време на привремена спреченост за работа согласно законот е задолжително здравствено осигурување. Паричниот надоместок за привременото отсуство поради бременост, раѓање и мајчинство по својот социјален карактер е обврска на државата. Покрај ова, жените регистрирани како индивидуални земјоделки се исклучени од Законот за здравствено осигурување и не го добиваат ова фундаментално право. Земјоделките, де факто, се статусно дискриминирани во однос на другите работнички – оваа нееднаква социјална политика има сериозни последици врз нивното репродуктивно, психичко и физичко здравје“, вели Крмов.
Тој посочи дека заштита на мајките е фундаментално право кое не треба да се заслужува, а овој проблем во целост го нотира и извештајот на ЕК.