Случајот со издавањето на безбедносен сертификат со степен „државна тајна“ на вицепремиерот бипатрид Арбен Фетаи, кој поседува и друго државјанство покрај македонското, отвора сериозни прашања во однос на законитоста на постапката, примената на Законот за класифицирани информации и можната кривична одговорност на повеќе чинители, велат од Левица.
Точно е дека согласно член 40 од Законот, функционерите (меѓу кои и Фетаи) не подлежат на оперативни безбедносни проверки, но тоа не претставува основ за исклучување на обврските што произлегуваат од другите одредби! Напротив, обврската за поднесување Барање и пополнување на Безбедносен прашалник постои и за овие лица.
Согласно член 39 став 3, Владата како правно лице за своите функционери е должна да достави Барање за добивање на сертификат и задолжителен прилог – Безбедносен прашалник, пополнет и лично потпишан од кандидатот. Барањето мора да биде потпишано од одговорното лице на институцијата, во овој случај претседателот на Владата Христијан Мицкоски.
Во самиот прашалник, кој е составен и непрескоклив дел на постапката, децидно се бараат информации за државјанството – дали лицето има двојно државјанство, дали поседувало друго државјанство претходно или пак е во процес на стекнување на државјанство од друга држава и сл.
Во таа насока, членот 41 од Законот е сосема јасен и не предвидува никакви исклучоци ниту за функционерите наведени во член 40! Таму е наведено дека предуслов за издавање на безбедносен сертификат со степен „државна тајна“ е, меѓудругото, лицето да не е државјанин на друга држава!
Оттука произлегуваат неколку можни сценарија, од кои секое води до заклучок дека законската постапка е прекршена и дека постои основ за кривична одговорност:
– Доколку до Дирекцијата за безбедност на класифицирани информации воопшто не пристигнало Барање и пополнет Безбедносен прашалник, доколку е поднесено само Барање без приложување на пополнет Безбедносен прашалник или пак доколку се поднесени потребните документи уредно пополнети – како ДБКИ го дерогирала Законот и на бипатридот Арбен Фетаи му издала безбедносен сертификат „државна тајна“?;
– Доколку Арбен Фетаи при пополнувањето на Безбедносниот прашалник намерно или ненамерно не го навел второто државјанство покрај македонското, тогаш тој ја затаил таа информација и сторил кривично дело, особено имајќи предвид дека на крајот на прашалникот се потпишува и Изјава за вистинитост, точност и целосност на информациите под морална, материјална и кривична одговорност;
– Доколку постапката за добивање на сертификат ја водел офицер за безбедност на класифицираните информации – и ова лице подложи на одговорност, а доколку Барањето е потпишано и од премиерот Мицкоски, тогаш одговорност постои и кај него.
Овој случај на дерогирање на законите за „мир во куќа“ на ДПМНЕ и ВРЕДИ, до степен на обезбедување пристап до државни тајни на законски непожелно, неповикано лице, претставува сериозен преседан кој ги доведува во прашање интегритетот на институциите, но пред сѐ националната безбедност, велат од партијата.