Левица соопшти дека утре ќе одржи координативна средба со опозициските партии со цел усогласување на ставовите околу измените на Изборниот законик, со акцент на воведувањето на една изборна единица.
Од партијата оценуваат дека владејачкото мнозинство се повлекло од процесот на подготовка на Изборниот законик и ја префрлило одговорноста врз опозицијата. Според Левица, ВМРО-ДПМНЕ го оптоварила процесот со прашањето за гласањето на дијаспората, кое, како што тврдат, не било дел од мандатот на работната група, а потоа се дистанцирала од разговорите.
„Власта не може да биде предлагач на закон, да располага со парламентарно мнозинство, а истовремено да се однесува како обичен набљудувач на процесот“, наведуваат од Левица.
Партијата најавува дека на средбата ќе се направи обид да се усогласат ставовите на опозициските субјекти и да се формулира заеднички предлог кој ќе биде доставен до владејачкото мнозинство.
Од Левица повторуваат дека нивен приоритет е воведувањето на една изборна единица, за која сметаат дека ќе обезбеди еднаква вредност на секој глас, ќе ги намали изгубените гласови и ќе овозможи пореално претставување на волјата на граѓаните во Собранието.
Според партијата, целта на иницијативата е да се постигне заедничка позиција на опозицијата околу оваа изборна реформа, а не да се одржи уште една средба без конкретен исход.