Во текот на летните месеци во подрачјето на надлежност на Полициска станица во Гевгелија регистрирани се 27 кражби за 27 дена, што во просек значи по една кражба дневно.
Ова е драстичен пораст на кражбите во текот на летната годишно одморска сезона. Само во претходниот месец, јуни и средината на јули, дневниот коефициент на кражби изнесуваше 0,22, со регистрирани 10 кражби, а во последниот месец коефициентот порасна на чиста единица (1,00).
Нискиот животен стандард ги инспирира крадците на секакви прекршоци со цел да дојдат до имотна корист, така што мета на нападите, покрај семејните куќи се и дворовите, продавниците, нивите, па дури и плажите во излетничките места. Она што е предмет на нападите е од различни тип: од мобилен телефон, телефакс, теписи, електрични броила, електрична енергија, радио, велосипед, цигари, пари, пилиња, црева за наводнување, куче, па сè до домашна ракија.
Причинетата материјална штета од украдените предмети, според извештаите на ПС со општа надлежност Гевгелија, изнесува 225.049 денари, или дневното олеснување на граѓаните опфаќа сума од 8.335,15 денари.
Во истиот период евидентирани се 11 нарушувања на јавниот ред и мир. Ова е само уште еден показател дека летото ја разбудува адреналинската авантура, на тие со пари – во патувања низ туристичките места дома и во странство, а на тие без пари – со физички напади (7), карање и викања (2), учество во тепачка (2) и други прекршоци (1), да ја испразнат несаканата фрустрација од животот. Извештајниот период се однесува на деновите од 15.7 до 11.8.2013 година.
Во истиот период според ПС-ОН Гевгелија регистрирани се и 10 сообраќајни незгоди во кои се повредени 10 лица, а како причина за несреќите се наведени неприспособената брзина, возење под дејство на алкохол и непочитувањето на сообраќајните правила. Материјалната штета изнесува околу 10.000 евра.
А.Д.