Згрозени сме од обидот за убиство на нашиот колега на 9 ноември на неговото работно место и реакциите на јавноста. Читаме се посилни повици за линч на лекарите и ширење на лажни информации за кои цврсто веруваме дека се невистинити. Се деградираат професионалци кои со љубов и пожртвуваност ја работат својата хумана професија и отсуството на поддршка во вакви тешки моменти особено не повредува.
Ова го соопшти Лекарскиот колегиум на ЈЗУ Универзитетска клиника за дигестивна хирургија-Скопје, кој, како што се наведува, како израз на револт и разочараност, едногласно одлучил дека денеска, утре и задутре нема да се оперираат елективни случаи и да се вршат елективни амбулантски прегледи. Оттаму, посочуваат дека итните случаи соодветно ќе бидат згрижувани.
Од Лекарскиот колегиум на Клиниката за дигестивна хирургија најостро го осудуваат говорот на омраза во јавноста искажан преку социјалните мрежи, портали односно пишаните и електронските медиуми.
Она што особено не загрижува е отсуството на реакција на повиканите институции истото да го спречат, осудат и санкционираат. Разбирајќи го незадоволството на граѓаните поради длабоко нарушената доверба: лекар-пациент, сепак е неразбирлив од наша страна повикот за линч на сите лекари, стои во соопштението.