Лекарите од клинички центар бараат оставка од министерот за здравство Никола Тодоров и итни измени на законите што ја регулираат оваа сфера. Доколку тоа не се случи тие најавуваат дека нема да вршат никакви операции на клиничкиот центар во хируршките клиники.
– Морална одговорност од министерот за здравство, законот за здравствена заштита да се врати исто како тој пред 2011 година, од кога со измените лекарите се доведени во ваква состојба и Лекарската комора да предложи закон за лекари кој Владата ќе го прифати без забелешки , се барањата на лекарите по денешната средба.
Ваквиот став лекарите го соопштуваат по пукањето во хирургот Љубомир Оненовиќ од страна на незадоволен пациент чија мајка била доведена во тешка состојба на клиниката, а подоцна починала.
Во хирургот било пукано со пиштол во ногата, тој е опериран и е надвор од животна опасност. Клиниките во моментов се затворени, а се примаат само итни случаи.
Во здравството владее хаос подолго време, иако министерот и владата убедуваат дека е меѓу првите во светот по понудените услуги.