ЛДП бара разрешување или интерпелација на министерот за одбрана фатмир Бесими, по како што велат во соопштението, скандалозното поклонување и положување на венци и цвеќе на споменикот на жртвите на УЧК од 2001 година
За Либерално- демократската партија, уште позагрижувачки се изјавите кои следеа по повод настанот, од страна на Владата, Генералштабот и владеачката ВМРО-ДПМНЕ.
„Ако се искрени оградувањата од страна на релевантните институции, тогаш очигледно е дека станува збор за целосна некординираност и самоволие во водењето на државната политика, особено во еден така значаен сегмент каков што е одбраната“, велат од ЛДП.
Имајки ги во предвид реакциите на Владата, според кои министерот за одбрана постапил без одлука донесена на Влада, за ЛДП е логично, премиерот да побара одговорност и веднаш да го разреши од функцијата.
„Во случај премиерот да нема доблест да го стори тоа, а по изјавата на директорот за комуникации на ВМРО-ДПМНЕ, во која истакнува дека овој чин не ги одразувал политиките и политичките ставови на нивната партија, единствен логичен чекор е Интерпелација за минстерот за одбрана, поднесена токму од пратеничката група на ВМРО-ДПМНЕ во Собранието на Република Македонија“, бара ЛДП.
Според ЛДП, доколку не се преземат овие мерки, станува сосема јасно дека овој настан е само продолжение на амнестирањето на хашките случаи, а оградувањата на Владата и изјавите од ВМРО-ДПМНЕ претставуваат уште една груба лага, лицемерие и манипулација со сопствениот народ.