Македонија треба да добие датум за почеток на пристапните преговори со ЕУ, смета министерот за надворешни работи на Словачка, Мирослав Лајчак.
Во интервју за босанскиот весник „Дневни аваз“ Лајчак вели дека очекува Македонија и Србија да бидат на дневниот ред на претстојните состаноци на Советот на ЕУ и да им биде одреден датум за старт на преговорите.
– Мојот став е дека Македонија треба да добие покана за отворање на пристапните преговори за да бидеме преокупирани со позитивни работи. Но, сите не го делат тоа мислење. Во регионот има земји кои имаат проблеми со Македонија. Не сакам да ги прејудицирам резултатите од нашите разговори во наредните два дена, истакнува Лајчак.
Шефовите на дипломатиите на земјите членки на ЕУ ќе се состанат денеска и утре во Луксембург. Кога е во прашање Балканот се очекува шефовите на дипломатиите на 27 држави од ЕУ да разговараат за Србија и за Македонија, како и за парламентарните избори во Албанија, пишува „Дневни аваз“.