Кандидатот за градоначалник на ВМРО-ДПМНЕ и коалицијата За подобра Македонија за општина Карпош Јагнула Куновска вели дека нејзината изборна програма со 117 проекти од кои 50 капитални е производ на потребите и проблемите со кои се соочуваат жителите на општината.
– Целта на оваа наша заедничка програма со граѓаните е да имаме економски подем во општината и да се отворат нови работни места, што е предвидено со капиталните објекти што треба да се изградат во општината, рече денеска на прес-конференција Куновска.
На барање на граѓаните, информира, меѓу другото се планира изградба на економска зона, поголеми и помали пазари, реконструкција, верски објекти, нов драмски театар, дом за стари лица, повеќе пензионерски клубови, детска градинка, спортски центри. Куновска тврди дека за проектите што ги ветува се обезбедени финанси и оти ќе се запазат роковите за реализација. Поголемиот дел, ветува, ќе бидат завршени следната година, а проектите што се пообемни и од поголемо значење во 2016 година.
Посочувајќи дека за разлика од другите кандидати за градоначалници на Карпош, нејзината програма била промовирана пред два месеци, ги обвини Стевчо Јакимовски и Андреј Петров за плагијат на нејзини проекти од програмата.
– Мислам дека граѓаните на Карпош ги познаваат и двајцата, но нивната волја е слободна и секој може да се определи при изборот на градоначалник во општината, рече Куновска.