Внатрешна контрола на МВР расчистува случај на инволвираност на полицајци во физичка пресметка на „Комитска вечер“ во Крива Паланка од изминатиот викенд, oваа информација, како и фотографиите до А1 ги испратија наши читатели, сведоци на настанот.
Според сведоштва на присутните, на „Комитска вечер“ во Крива Паланка во организација на ВМРО-ДПМНЕ, пред очите на повеќето гости меѓу кои, министерот за образование Панче Кралев, како и пратениците Влатко Ѓорчев, Веле Георгиевски и други, се одвивала вистинска хорор драма.
При крајот на вечерта кога повеќето гости биле во алкохолизирана состојба се случила физичка пресметка во која еден од гостите се здобил со сериозни повреди, резултат на неколку удари по телото од припадник на полицијата, кој исто така бил гостин на прославата, а во врска со јавно искажаното незадоволство за тоа во кој правец оди локалниот огранок на партијата.
Откако повредениот успеал некако да се спаси, случајот телефонски го пријавил во полиција, но од таму никој не излегол на увид. Видно изнервиран, посегнал по автомобилот на полицаецот со камења, при што сите стакла биле скршени, но овој пат полицијата дошла и е направен увид за направената штета.
Поради ваквиот селективен однос на дежурните полицајци и заради можноста целиот случај со физичкиот напад да биде сокриен, претепаниот гостин бил приморан да ја извести внатрешната контрола на МВР која го испитува целиот случај,информира за А1, очевидец на настанот.