Полицијата презема мерки за расчистување на случајот со врсничкото насилство во скопската населба Аеродром, каде 12-годишно девојче било понижувано и физички нападнато од група малолетници.
Според информациите од Министерството за внатрешни работи, на 1 јули 2026 година во 19:30 часот во СВР Скопје, 31-годишна жена пријавила дека нејзината 12-годишна ќерка на 30 јуни, околу 22:00 часот, во парк на подрачјето на Општина Аеродром била физички нападната од 14-годишна малолетничка.
Како што е наведено во пријавата, девојчето претходно било принудено во два наврати да клекне на колена и да се извинува, а кога се обидело да си замине, било физички нападнато од друга малолетничка. Целиот настан бил сниман со мобилен телефон од повеќе малолетници кои биле присутни, при што жртвата препознала едно од лицата.
Истиот ден, во полициска станица бил извршен службен разговор со две малолетнички во присуство на нивните родители.
За случајот е известен јавен обвинител за малолетници, како и Меѓуопштинскиот центар за социјална работа.
Од МВР информираат дека се преземаат активности за утврдување на идентитетот и на останатите инволвирани малолетни лица, со цел целосно расчистување на случајот. По завршувањето на истрагата ќе бидат поднесени кривични пријави за кривичните дела „насилство“ по член 386 и „запуштање и малтретирање на малолетно лице“ по член 201 од Кривичниот законик.