Секторот за внатрешни работи Велес до надлежното обвинителство поднесе кривична пријава против А.ф. (43) и Х.Е. (35), двајцата од Велес, поради основано сомнение дека сториле кривично дело „Неовластено производство и пуштање во промет наркотични дроги, психотропни супстанци и прекурзори“.
Истражен судија на двајцата им одреди мерка притвор во траење од по 30 дена.
А.Ф. поседувал поголемо количество марихуана која имал намера да ја продаде поради што стапил во контакт со Х.Е. и се спријателил, а по кратко време му дал 22 идентични пакувања со вкупна тежина од околу два килограма. А.Ф. инсистирал Х.Е. да најде купувачи и да ја продаде дрогата. За да бидат постојано во контакт му дал мобилен на кој постојано му се јавувал да ја продаде дрогата и да му ги исплати парите, му обезбедил и кујнска вага. Неможејќи да го истрпи притисокот од првопријавениот, Х.Е. стапил во контакт со непознати лица од Кочани и со нив договорил купопродажба на одредена количина марихуана.
На 13-ти овој месец, А.Ф. му дал на Х.Е. 1.000 денари за автобус да отиде во Кочани и да продаде 80 грама марихуана. При рутинска контрола од страна на полицијата, пред влезот во Кочани е сопрен автобусот и е пронајдена дрогата, а второпријавениот е приведен во полиција.
При извршениот претрес во куќата на второпријавениот се пронајдени 22 пакувања марихуана со тежина од околу два килограма.