СВР-Скопје до надлежното Основно јавно обвинителство поднесе кривична пријава против М.С. (19) од Скопје поради основано сомнение за извршени 10 кривични дела – една кражба, три тешки кражби и шест тешки кражби во обид, при што стекнал противправна имотна корист од 389.360 денари.
На пријавениот му е одредена мерка притвор во траење од осум дена.
Како што соопшти МВР, М.С. кривичните дела ги извршил во периодот од почетокот на јуни до средината на август годинава на подрачјето на Центар, Кисела Вода, Ѓорче Петров и Карпош. Со употреба на физичка сила, со помош на подесен алат и со прекачување влегувал во домовите, претурал и пребарувал при што одзел еден пиштол „Црвена Застава“ калибар 7,65мм, рамка со пет куршуми, една празна рамка за истиот пиштол, мобилни телефони различни марки, еден телевизор, златен накит (прстени, ланци, привезоци, обетки) златници со различни ликови, разна бижутерија, машки и женски часовници, девизи (евра), денари и други предмети.
По извршувањето на кривичните дела М.С. украдените предмети ги продавал на Бит Пазар и на пазарот под Кале (пиштолот заедно со куршумите и рамките го продал на непознато лице на Бит Пазар за 100 евра) украдените евра ги заменувал во менувачница на влезот од Скопската чаршија, додека добиените пари ги потрошил за купување опојни дроги и за други лични потреби.
Во разговор со полицијата целосно ги признал делата и го опишал начинот на нивното извршување.
Против М.С. од 2011 до 2014 година се поднесени осум кривични пријави од областа на имотните деликти.