Поранешната директорка на Клиниката за радиотерапија и онкологија во Скопје, 44-годишната С.К., која сега работи како лекарка на истата Клиника, доби пријава за злоупотреба на службената положба и овластување.
Според полицијата, таа како директор не ги почитувала одредбите во договорот за набавка на лекови и го оштетила Фондот и Универзитетска клиника за околу 350.000 евра.
Лани била донесена одлука, потпишана од екс директорката, за јавна набавка за потребите на Клиниката за период од 2011-2012, а се однесувало на набавка на лекови кои се на товар на ФЗОМ. Покрај другото како дел од тендерската документација била приложена и спецификацијата на лекови меѓу кои и лек-цитостатик.
Откако бил потпишан договор со фирмите, ден пред потпишувањето, осомничената иако знаела дека во клиничката аптека има залиха од наведените лекови, набавила дополнителна количина, а цената на лекот била драстично поголема.
Без консултација со стручниот колегиум на Клиниката, според попднесената пријава, директорката изготвила и спецификација на лекови, но не специфицирала лекови кои не се на позитивната листа на ФЗОМ, а потоа за нив склучила договори со најповолните понудувачи и вршела набавка на лекови.