Малолетник на возраст од 14 години доби кривична пријава поднесена од Одделението за малолетничка деликвенција и семејно насилство при СВР Скопје, поради сомнение дека извршил кривично дело „тешка кражба во обид“, за што му е одредена и мерка притвор во траење од 30 дена, соопштија од МВР.
– На 3 октомври оваа година, пријавениот со намера да се стекне со противправна имотна корист, во населбата Драчево, во куќа, извршил кражба со што причинил материјална штета од 6.000 денари. Со употреба на физичка сила и погоден предмет извадил една од решетките од металната врата со која дополнително била обезбедена балконската врата од кујната каде направил отвор, потоа со подесен алат делувал на крилото од балконската врата и успеал да ја отвори. Влегол во куќата со намера да изврши кражба но откако не пронашол ништо вредно што би можел да го украде, без да направи поголемо претурање се откажал од натамошните намери и по истиот пат од каде што влегол ја напуштил куќата и заминал во непознат правец, се наведува во соопштението.
Според евиденција на Министерството за внатрешни работи, против малолетникот во текот на 2014 година се поднесени 9 кривични пријави за извршени 14 кривични дела.