Довчерашниот премиер Димитар Ковачевски му ја предаде функцијата на новиот технички премиер Талат Џафери кој рече дека првиот фокус и ангажман во Владата ќе му биде скрининг на организацијата и определување на сите работни тела.
– Како премиер првиот ден е скрининг на организацијата и функционирањето и потоа да се определат сите работни тела – истакна Џафери.
Ковачевски рече дека основна задача на оваа Влада е да организира и спроведе слободни, демократски и фер претседателски и парламентарни избори.
– Сите започнати политики треба целосно и континуирано да се реализираат. Очеувам посветеност во работата концентрација на сите во владата и во оваа насока сметам дека работата ќе биде на највисоко ниво. Повикувам владата и сите во неа без разлика на партиската припадност да работат во интерес на граѓаните, на економијата, на безбедноста и на стабилноста.
Владата успеа да воспостави систем кој функционира во време на криза, политиките се поставени, мерките се јасни, очекувам сите да покажат јасна политичка волја за да се поддржи и одржи и економската и политичката стабилност и да се спроведат мирни, фер и демократски избори како што доликува на држава членка на НАТО и држава со отпочнати преговори со ЕУ“, истакна Ковачевски.