Поранешниот премиер на Украина, Микола Азаров, е осуден во отсуство на 15 години затвор, вклучувајќи и конфискација на имот, за велепредавство, објави денес Безбедносната служба на Украина (СБУ).
Според соопштението, истрагата утврди дека додека се криеше надвор од Украина, Азаров активно соработуваше со руските специјални служби со цел да извршува субверзивни активности во интерес на Кремљ, пренесува Укринформ.
Меѓу другото, тој редовно дистрибуира „антиукраински наративи во интерес на московските пропагандисти“, според соопштението на СБУ.
Се забележува дека во јавните обраќања, Азаров „ја оправдува вооружената агресија на Руската Федерација, привремената анексија на дел од Украина и ширел лажни тврдења за социо-политичката ситуација во Украина“.
За ширење „информативна саботажа“, Азаров користеше канали на Телеграм и Јутјуб, како и лични страници на социјалните мрежи, според СБУ.
Според материјалите од случајот, неговиот асистент, поранешен вработен во една од окружните администрации на Киев, беше задолжен за управување со информациските ресурси на поранешниот премиер и подготовка на провокативни публикации.
Врз основа на истрагата на контраразузнавачките служби и истражителите на СБУ, Азаров е прогласен за виновен за велепредавство според воена состојба, дејствија насочени кон насилно менување или соборување на уставниот поредок или преземање на државната власт, посегнување по територијалниот интегритет и неповредливоста на Украина, како и оправдување и негирање на вооружената агресија на Русија против Украина и величење на нејзините учесници.
Суд во Киев осуди еден од неговите помошници во отсуство на 10 години затвор со конфискација на имот.