Бугарскиот европратеник од ГЕРБ, Андреј Ковачев, смета дека Македонија нема основа да се жали пред европските институции за случајот со Ива Михаилова, која и покрај судската забрана ја напушти земјата и замина во Бугарија.
Во синоќешното гостување на Бугарската национална телевизија (БНТ), Ковачев изјави дека за случајот лично ја информирал претседателката на Европската комисија, Урсула фон дер Лајен, на состанокот на Европската народна партија (ЕПП).
„Ја информирав претседателката на Европската комисија, Урсула фон дер Лајен, за ситуацијата и сметам дека Скопје нема причина да се жали на Бугарија. Што точно направила Бугарија што е проблематично? Апсолутно ништо“, изјави Ковачев.
Тој оцени дека случајот треба да се разгледува од хуманитарен аспект, посочувајќи дека здравствената состојба на Михаилова бара итно внимание и дека таа има право на соодветна медицинска нега.
Реакцијата на бугарскиот европратеник доаѓа откако македонското Министерство за надворешни работи најави дека за заминувањето на Михаилова од земјава, и покрај судската забрана, ќе ги информира Европската Унија и Советот на Европа.
Од Министерството оценија дека постапувањето на бугарските институции во случајот ги подрива напорите за градење доверба и е спротивно на заложбите за развој на добрососедските односи.