Трибината што ја организираа од Унијата на млади сили во Струмица, во малата сала во Центарот за култура „Антон Панов“, е уште една потврда дека времето на Никола Груевски и ВМРО-ДПМНЕ помина. Празните места ги пополнија со малолетници, рече денеска Костадин Костадинов, портпарол на ОО СДСМ Струмица.
– Лагите и манипулациите веќе не минуваат ниту кај членовите на ВМРО-ДПМНЕ. И на партискиот собир во село Вељуса, имало присуство на малолетни лица, на возраст од десетина години, за да се прикрие загубената поддршка на врвот на оваа партија дури и кај сопственото членство. Како што може да се види од оваа фотографија, малолетни деца се сликани заедно со директорот на јавното претпријатие „Македонски шуми“ подружница Струмица и други локални функционери на ВМРО-ДПМНЕ. Ова е скандал и претставува класична злоупотреба на деца. Согласно правните прописи во Република Македонија се забранува секаков вид на злоупотреба на децата. Во Законот за заштита на децата, член 12. став 4 стои: Се забранува злоупотреба на децата поради политичко или верско организирање и дејствување – рече Костадинов.
СДСМ бара надлежните институции под итно да преземат мерки, а партијата оваа злоупотреба ќе ја пријави во детската амбасада „Меѓаши“ и во ОБСЕ.