Портпаролот и пратеник на СДСМ, Костадин Костадинов денеска побара оставка од пратеникот на ВМРО-ДПМНЕ, Антонијо Милошоски, поради како што кажа, низата дезинформации кои ги шири изминатиот период во јавноста.
„Дезинформаторот Милошоски не е достоен да ја врши функцијата пратеник во Собранието и треба да си поднесе оставка. Милошоски ја злоупотреби собраниската говорница и пратеничките прашања за да шири лажни вести, со што го наруши угледот на Парламентот. Милошоски се промовира како најголем извор на лажни вести. Неговите лаги дека бизнисмен бил рекетиран и барал помош од амбасадата на Белорусија во Белград беа демантирани од конзулот на Белорусија во Република Северна Македонија. Јасно е наведено дека се што беше искажано од собраниската говорница се лажни вести“, рече Костадинов.
Пратеникот од СДСМ посочи дека ова не е прв пат Милошоски да се однесува вака срамно, неодговорно и недостојно.
„Милошоски лажеше дека седум членки на ЕУ биле против продолжување на преговорите на Македонија со Унијата. Тогаш како и сега Милошоски не покажа ниту грам одговорност и не се извини за изнесените лаги. Тогаш и сега Милошоски покажа дека намерно носи одлуки кои се на штета на интересите на граѓаните“, рече Костадинов.