Критична останува состојбата во долното течение на Вардар каде се заканува опасност од излевање на реката околу Демир Капија, пред клисурата, како и низводно во правец на Гевгелија, соопшти Координативното тело кое денеска имало состанок во Министерството за транспорт и врски.
– И помалите притоки на Вардар на потегот од Демир Капија до Гевгелија (Бошава, Дошница, Стара, Кованска, Серменинска, Коњска и Анска) поради високиот водостој на Вардар и неможноста да се влијат во него би можеле да се излеат и да направат заезерување и поплавување пред вливот, односно во устијата на реките, информира Координативното тело за справување со кризи.
Екипи на сите надлежни институции се на терен и ги расчитуваат поплавените подрачја, а на критичните делови се преземаат превентивни мерки.
Координативното тело препорачува будно следење на состојбата од страна на сите надлежни институции. До градоначалниците апелира да ги активираат сите потребни ресурси и доколку имаат потреба да се обратат до Дирекцијата за заштита и спасување.
На граѓаните им се препорачува ако имаат проблеми да се јават на бесплатниот број 195 во Центарот за управување со кризи, а на сите возачите внимателно возење и информирање за состојбата на патиштата.