Деветмината советници избрани во општинскиот совет на Ранковце на локалните избори одржаа прва конститутивна седница на која покрај новоизбраниот градоначалник, Ивица Тошевски, присуствуваа и поранешните градоначалници Момчило Алексовски и Трајче Давидовски.
Претседателот на Општинската изборна комисија, Даниел Крстевски, им ги додели уверенијата на советниците. Советот ќе работи со тројца советници од Коалицијата предводена до ВМРО-ДПМНЕ, тројца советници од Коалицијата предводена од СДСМ и тројца од независната листа на Димитар Цветковски.
На конститутивната седница за претседател на Советот на Ранковце беше избрана Христина Младеновска.
Градоначалникот на Ранковце, Тошевски, посака успешна работа на Советот, добра соработка со општинската администрација и работа во интерес на подобрувањето на квалитетот на живот за сите граѓани.
– Ќе работиме посветено заедно со советниците за прво за решавање на состојбата на финансиска блокада на општината, за привлекување инвеститори кои ќе отворат нови работни места, во државната и дополнителната индустриска зона, со што ќе се задржат младите во нашата средина и нема да се одлева младиот кадар, а еден од приопритетите е и враќање на амбулантата и отворање рурална аптека за да се овозможат добри здравствени услуги за жителите- рече Тошевски.