Вкупно 285 излегувања на терен за гасење пожари и за технички интервенции имала Територијалната противпожарна единица од Кочани во текот на минатата година, што е за околу 20 отсто повеќе во однос на претходниот период.
Најголем број од интервенциите, односно 253 биле за гасење оган на отворен простор и запалени шуми, при што била опожарена површина од над 476 хектари, што е на слично ниво со претходниот едногодишен период.
– Освен на отворено, нашите екипи гасеа пожари и кај 67 запалени објекти, а во 11 случаи интервенираа кај запалени патнички моторни возила. Покрај тоа, имавме 19 технички интервенции во асистенција при извлекување повредени во сообраќајни несреќи, помош при поплави и слични случаи, истакна командирот на Проитивпожарната единица од Кочани, Благој Паунов.
Интервенциите биле на територијата на општините Кочани, Зрновци и Чешиново-Облешево, со оглед што согласно Законот за пожарникарство, кочанските пожарникари имаат надлежност да го покријат нивниот терен.
Исто така, ТППЕ – Кочани во пет случаи им давала помош во опрема и кадар и на противпожарните единици од општините Виница, Македонска Каменица и Делчево.