Изградба на системи за водоснабдување во сите населени места каде што нема, пред се во селата Горно Оризари, Бузалково и Клуковец, изградба на колекторски системи и пречистителна станица за прифаќање фекални отпадни води во индустријата и домаќинствата, како и изградба на регионална фабрика за третман на цврстиот комунален отпад со претоварна станица во Велес, најави денеска кандидатот за градоначалник на Велес од СДСМ Аце Коцевски.
Презентирајќи ја предизборната програма, Коцевски рече дека негов приоритет ќе бидат здравата животна средина и чистата вода за пиење.
– За жал, Велес никогаш не бил по нечист и по неуреден од сега. Насекаде низ градот, преполни контејнери и ѓубре расфрлано од животните на сите страни, безброј кучиња – скитници по улиците. Затоа здравата животна средина и обезбедувањето чиста и здрава вода за пиење се нашиот врвен приоритет, нагласи Коцевски.
Тој предвидува и замена на сите азбест-цементни цевки од градската водоводна мрежа и азбестцементни кровови од јавните објекти во Велес, а со проектот на гасификација, намалување на издувните гасови.
– Планираме и бројни активности, меѓу кои и зафати за подобрување на состојбите со зеленилото, напомена кандидатот за градоначалник Аце Коцевски.