Струмичкиот речен слив ќе се реставрира со финансиска поддршка од швајцарската Влада, а ќе се имплементира преку Програмата за развој на ОН во Република Македонија. Проектот е во времетраење од една година, а вредноста е 315.790 американски долари.
Договорот го потпиша денеска министерот за животна средина и просторно планирање Нурхан Изаири и постојаниот претставник на Програмата за развој на Обединетите нации во Република Македонија (УНДП), Луиза Винтон.
Целта на проектот е реставрација на социо–еколошките функции на речниот слив Струмица преку развивање план за управување со сливот и хармонизација на националното законодавство со ЕУ директивите. Воедно, првпат ќе се преземат национални напори за применување на ЕУ принципите во поглед на справување со ризиците од поплави.