Советот на општина Кочани на денешната 20 седница одлучи да се наплаќа паркинг во централното градско подрачје. Цената за паркирање од 10 денари на час останува, а се намалува само просторот каде ќе се наплаќа за паркирање, од првобитните десетина локации понудени во предлог-програмата.
– Со паркиралиштата за првите три месеци, додека трае пробниот период, ќе стопанисува КЈП „Водовод“. За паркирање ќе се плаќа само таму каде општината смета дека се најфреквентните места во градот и каде паркирањето пречи во одвивањето на нормалниот сообраќај, изјави Јордан Димитров, претседател на Советот на општина Кочани.
Со првобитната одлука беше определено да се наплаќа за паркирање на потегот од двете страни на Кочанска река, од зградата на општината до Поштата и населбата Стришани и тоа да го прави приватна фирма со јавно-приватно партнерство.
На седницата не беа прифатени сугестиите од опозицијата за собирање потписи од граѓаните за плаќање на паркинг простор.