Ветуваме вода за наводнување за земјоделските површини кои сега не се наводнуваат, рече на денешната прес-конференција Бетиане Китев, кандидат за градоначалник на Кавадарци од СДСМ и коалицијата.
– Се наоѓаме во Брушани, околу се селата Ресава, Бегниште и Дабниште. Регион од кој сите винарии ја црпат основата за производство на вино. Даваме ветување и се обврзувам заедно со Владата за овој регион да изградиме и инсталираме пумпна станица која ќе црпи вода од езерото и ќе ги задоволи потребите на лозаропроизводителите. Од формирањето на езерото па до денес населението од овој крај е без можноста за наводнување на земјоделските површини, нагласи Китев.
Со тоа, рече, земјоделците од овој крај се во незавидна состојба.
– Идејата за изградба и инсталација на пумпна станица е стара, но до денес нереализирана. Еден крак од пумпната станица ќе се насочи кон високите површини на Возарци и Дреново. Ова е значаен проект кој го нудиме за населението од овој регион и заедно со Владата тоа и ќе го реализираме, соопшти тој.
Додаде дека од овој проект дополнително поволност ќе имаат сопствениците на викенд куќите на брегот на езерото, со тоа што ќе добијат технолошка вода.