Соработката со Владата е клучна за развојот на општина Кавадарци, рече денеска на прес-конференција кандидатот за градоначалник на тој град од редовите на СДСМ и коалицијата, Бетиане Китев.
– Гасификацијата, градинката, новата противпожарна станица, становите за млади брачни парови и самохрани родители, затворениот пазар, но и сите останати суштински инфраструктурни проекти кои се насушно потребни на нашиот град, општината без помош од централната власт самостојно не може целосно да ги реализира. Развојот на општина Кавадарци е силно врзан со блиската соработка со централната власт, посочи Китев.
Изминативе осум години, иако, како што рече, локалната и централната власт беа под ВМРО-ДПМНЕ, „сепак многу малку средства од централно ниво како капитални дотации се влеваа во буџетот на општина Кавадарци, споредено со другите општини во Македонија”.
– Но, причината за тоа е скоро никаквата лоби моќ и влијание на овдешното раководство на ДПМНЕ во Владата во Скопје, за разлика од другите општини кои лобираа многу повеќе. Од друга страна, ние како Општинска организација на СДСМ од Кавадарци и јас лично како долгогодишен пратеник, имаме изградено силни и блиски релации и со премиерот Зоран Заев и со сите министри во новата Влада на Република Македонија, рече Китев.
Токму тие релации и блиска соработка со Владата, потенцира, ќе бидат клучни сите овие капитални инфраструктурни проекти во Кавадарци да бидат реализирани со помош од Владата.
Тој прес-конференцијата ја одржа на местото каде треба да биде изграден нов поголем мост во Ваташа.
– Дури и противкандидатот од ВМРО-ДПМНЕ во својата програма има наведено дека овој нов мост, кој би чинел околу 300.000 евра, би се реализирал само во соработка со Владата. Соработката со Владата е суштинска за напредокот на Кавадарци и реализирањето на сите важни инфраструктурни проекти во нашата општина, додаде Китев.