На пребројани повеќе од половина избирачки места консензуалниот кандидат за претседател Стево Пендаровски е во водство пред Гордана Сиљановска Давковка, кандидат на ВМРО-ДПМНЕ и колацијата и кандидатот на Беса и Алијанса за Албанците, Блерим Река. Пендаровски води со 2,5 отсто пред Сиљановска, соопшти Александар Кирацовски, шеф на изборниот штаб на СДСМ.
Според него, победата на Пендаровски во првиот круг е очекувана.
„Предноста на Стево Пендаровски ќе значи сигурна победа и во вториот изборен круг. Во вториот круг очекуваме граѓаните уште посилно да го поддржат напредокот и процесот што води напред. Нема да набројам каде води Стево Пендаровски, ова се избори за претседател на државата, не се локални избори и ВМРО-ДПМНЕ бадијала се храбрат, јасно е дека губат во првиот и дека ќе изгубат и во вториот круг“, рече Кирацовски.
Тој кажа дека нема да толкува поединечни географски резултати. „Ирелевантно е дали на едно место победил еден, а на друго друг кандидат, на крајот се собираат резултатите според кои во овој момент Стево Пендаровски води“, рече тој.
Кирацовски кажа и дека во медиа центарот ќе пристигнеле и претставници од ДУИ.
Габриела Димковиќ-Мишевска