Претставници од Сојузот на здруженијата на пензионерите денеска добија објаснување од СДСМ за предлогот за штедење во буџетот за 2013 година, кој што веќе е доставен до премиерот и до Владата.
„Објаснивме што има во тој предлог и потенциравме дека со реализацијата на сите предложени мерки со кои што ќе се заштеди во буџетот и понатаму ги има сите предвидени пари за зголемените пензии на пензионерите. Воопшто не се ставаат во било каков ризик пензиите на пензионерите. Пари за пензиите има“, изјави потпретседателот на СДСМ, Зоран Јовановски.
„Она што владата треба да го направи е да го промени своето објаснување, да биде максимално домаќинска во дадените околности. Всушност ние сакаме владата денеска да се стави во истата позиција во која се наоѓа едно просечно македонско семејство. Значи тешка ситуација, тешки услови за преживување, и во такви околности домаќинско однесување“, рече Јовановски.
Со пензионерите СДСМ разговарале и за нивниот предлог, дефинирање на пензионерска потрошувачка кошничка.
Тој изјави дека не гледа причина зошто владата да не го прифатила предлогот на СДСМ за заштеди во буџетот, бидејќи тоа, тврди Јовановски ги елиминира оние трошоци кои што се непродуктивни и кои што не се соодветни за времето во кое што живееме.
„Ние апсолутно мислиме дека со прифаќање на нашиот предлог се отстрануваат сите нејаснотии за во иднина. Во тој контекст ние не сакаме на било кој начин пензионерите и исплатата на пензиите да се доведе под прашалник. Затоа го предлагаме ова што го предлагаме. Парите за пензиите ги има во буџетот и ќе ги има, и ќе се исплатат зголемени пензии, а притоа владата ќе се откаже од она што не мора да го троши денеска“, изјави Јовановски.
