Министерот за одбрана на Република Македонија, Зоран Јолевски, од денеска до 16 октомври ќе учествува на сеопфатниот регионален министерски состанок кој ќе се одржува во Будва, Црна Гора.
Во рамки на сеопфатниот состанок ќе се одржат состаноци на министрите за одбрана на земјите од САД-Јадранската повелба и СЕДМ (SEDM – South Eastern Defence Ministerial) – состанок на министри за одбрана во Југоисточна Европа и на политичките директори на земјите од Западен Балкан, соопшти денеска МО.
Најавено е дека на А-5 министерскиот состанок и на СЕДМ состанокот, министерот Јолевски ќе има свои обраќања.
На маргините на овој тридневен министерски состанок, тој се очекува да оствари неколку билатерални средби.
Целта на овој сеопфатен состанок е усогласување на регионалната одбранбена и безбедносна соработка на земјите од Западен Балкан и Југоисточна Европа во рамки на регионалните иницијативи на земјите од САД – Јадранската повелба (А5) и од соработката на министрите за одбрана од Југоисточна Европа (СЕДМ).