Министерот за одбрана Зоран Јолевски денеска во Богданци ги посети припадниците на АРМ кои се наоѓаат на обезбедување на нашата јужна граница со Грција, и објектот во кој се сместени војниците за да се запознае со условите во кои тие живеат и работат.
– Од моите претпоставени денеска бев информиран дека ситуацијата на нашата јужна граница е мирна и стабилна. Никогаш не била помирна откако се затвори „Балканската рута“ за бегалците. Значително е намален и бројот на обиди за нелегално минување на границата од страна на мигрантите, особено од есеноска наваму, поради што моментно овде имаме распоредено и најмал број војници во изминативе 18 месеци, рече Јолевски.
Како сериозна држава, потенцира министерот за одбрана, Македонија е подготвена соодветно да реагира доколку дојде до промена на ситуацијата.
– Будно го следиме развојот на настаните и нема да дозволиме да бидеме изненадени во поглед на бегалската криза. Имаме развиено резервни планови и подготвени сме соодветно да одговориме на секоја ситуација, нагласи Јолевски.
По обиколката министерот Јолевски ручаше заедно со војниците во Богданци.