Либерално-демократската партија со загриженост го следи постојаниот пад на животниот стандард на граѓаните на Р.Македонија. Во таа насока поразителен е податокот на Европската статистичка служба „Еуростат“, според кој Македонија се наоѓа на самото дно во регионот, а со тоа и во Европа според висината на минималната плата, велат од ЛДП.
„Податоците на „Еуростат“покажуваат дека минималната плата во Македонија е 131 евро , или засрамувачки, само едно евро повеќе од минималецот на Косово. Сите останати земји од регионот, Албанија(149), Бугарија(184), Србија(174) ,Црна Гора(191) и Босна и Херцеговина (191) имаат повисоки минимални плати од Македонија. Она што е поразително е тоа што минималната плата во Хрватска од 396 евра е повисока и од просечната плата во Македонија која изнесува 350 евра”, изјави во денешната прес конференција, портпаролот на ЛДП, Филип Јаневиќ.
Според Јаневиќ, после 9 години владеење, владата на ДПМНЕ изразува неспособност за обезбедување пристојни месечни примања, како и за достоинствен живот на граѓаните на Р. Македонија.
„Наместо денеска Македонија да се споредува со некоја западно-европска земја, ние сме „заковани“ меѓу најмизерните држави на Балканот.
Ако на овие катастрофални економски последици се додадат и криминалните афери во кои тоне владата, тогаш поднесувањето колективна оставка е најпатриотскиот чин што може да го направи оваа владеачка структура.
ЛДП, уште еднаш јавно ги повикува премиерот Груевски и неговите министри да си поднесат оставки и да дозволат формирање на преодна Влада која ќе создаде услови за нормален изборен процес во Р. Македонија“, порача Јаневиќ.