Јавно се откажувам од градоначалничката плата, нема да користам службено возило и службените обврски ќе ги извршувам со сопствено возило. Ова го рече денеска на прес-конференција Митко Јанчев, кандидат за градоначалник на Кавадарци од ВМРО-ДПМНЕ и коалицијата.
– Финансиските средства од градоначалничката плата ќе се префрлаат на донаторска сметка, ќе бидат наменети за хуманитарни цели и за решавање на социјални проблеми, нагласи Јанчев. Информира дека овој фонд за четири години ќе изнесува 50.000 евра, а распределбата на финансиските сдерства ќе ја врши тело составено од социјални работници и истакнати хуманисти.
По овие два основа, како што рече, буџетот на општина Кавадарци ќе заштеди околу 150.000 евра за период од четири години.
– Парите на граѓаните ќе се трошат одговорно, наменски и според реалните потреби на граѓаните. Ве уверувам дека секој ваш денар, вашите даноци и такси уплатени во општинскиот буџет, со мене како градоначалник, ќе имаат поголема вредност. Не случајно моето мото е „Кавадарци на прво место“, рече Јанчев.
Тој нагласи дека кандидатурата за градоначалник на општина Кавадарци ја поднел со голем ентузијазам и желба да направи крупни промени во локалната заедница, кои, како што рече, ќе придонесат кон подобрувањето на животните стандарди на сите граѓани во Кавадарци.
– Функцијата градоначалник, доколку граѓаните ми ја дадат нивната довербата, ќе ја извршувам исклучиво со намера и желба да дадам максимален придонес да се направи Кавадарци поубаво место за живеење, додаде Јанчев.