Владата на вчерашната седница ги донесе измените и дополнувањата на Законот за ветеринарно медицински препарати чија цел е заштита на здравјето и интересите на потрошувачите, подигнување на степенот на здравствена заштита и благосостојба на животните, како и обезбедување соодветна деловна клима за бизнис операторите.
Како што соопшти Министерството за земјоделство, со измените и дополнувањата се обезбедува детално уредување на ставање во промет, издавање и употреба на ветеринарно-медицински препарати со детално дефинирање кои и во какви услови може да се користат, кој може да ги користи и кај кои видови животни.
Се зголемуваат и обврските на професионалните лица што ги ставаат во промет и користат ветеринарните лекови.
– Измените и дополнувањата овозможуваат и засилени контроли во областа на потенцијално фалсификувани ветеринарно медицински препарати со систем на собирање податоци, пријавување за сомнение и информирање на надлежните институции и ветеринарните друштва и нивното нештетно уништување, наведува Министерството.