По црвениот картон од ВМРО-ДПМНЕ, исклучените седум пратеници веќе нема да бидат ниту дел од пратеничката група. Тие имаат две опции:да дејствуваат како независни пратеници или да формираат пратеничка група, бидејќи за тоа ги исполнуваат условите од Деловникот. Во тој случај тие ќе назначат и координатор. Пратеничката група има право на стручна помош и право да користи посебна просторија,но и да учествува активно во договарањата и координациите.
Доколку на Канческа-Милевска, Мукоски, Василевски, Арнаудов, Александрова, Исмајлоска-Старова и Рамчиловиќ би им се придружила и Владанка Авировиќ од редот на социјалистите, засега не се открива. Партијата не се изјасни, иако двајцата други пратеници од партијата на Ѕинго гласаа против отворањето на постапката за уставни измени.
И пратеникот од ГРОМ најави дека и откажува послушноста на ВМРО-ДПМНЕ поради исклучувањето на Јанчев и ја напушта пратеничката група.
Долгогодишниот пратеник на ВМРО-ДПМНЕ и еден од највлијателните луѓе во партијата, Илија Димовски вчера не беше виден на партиската прослава. Тој отворено кажа дека политиките на ВМРО-ДПМНЕ се движат во погрешен правец, а разрешувањата и исклучувањето на луѓе од ВМРО-ДПМНЕ во последниот период се избрзани и резултат на некорисни емоции и сериозен афект од состојбата.
Сега пратеничката група на ВМРО-ДПМНЕ брои 42 пратеника, но од денеска се очекува нејзино ситнење и прегрупирање. Дали е реален оптимизмот на Заев дека во наредните фази, измените на Уставот ќе бидат поддржани од повеќе опозициски пратеници и дали кадровската чистка на најголемата опозициска партија даде резултат или тоа ќе биде со контра-ефект, ќе се види многу брзо во наредните фази од носењето на амандманите.