СДСМ пред почетокот на продолжението на координацијата кај претседателот на Собранието Трајко Вељаноски, побара од првиот парламентарец да го повлече неговиот предлог за писмен одговор за тоа дали се прифатливи амандманите за буџетот обвинувајќи го за партиски пуч.
– Претседателот на Собранието Трајко Вељаноски во име на власта обзнани сценарио за партиски пуч во оваа држава, со кое треба да се погази, поништи Уставот, Деловникот, начинот на функционирање на ова Собрание во изминатите 20 години, изјави координаторот на пратеничката група на СДСМ Игор Ивановски.
Toj најави дека на средбата ќе оди во име на опозициските пратеници со последен апел до претседателот на Собранието да се откаже од ова сценарио.
– Да престане да ги слуша наредбите на ВМРО-ДПМНЕ. Тој нема ни поголем ни помал мандат од останатите пратеници во ова Собрание. Се надеваме дека ќе се откажат од ова катастрофално сценарио. Во спротивно, сите последици што ќе произлезат доколку останат на ова сценарио однапред најавуваме дека ќе бидат резултат или одговорност само на власта, на владејачката коалиција и на претседателот на Собранието Трајко Вељаноски, изјави Ивановски.
Појаснувајќи за каков предлог станува збор, координаторот на пратеничката група, рече дека според планот предвидено било вицепремиерот и министер за финансии во текот на денот да достави ставови „за“ или „против“, Комисијата за финансирање и буџет и Законодавно-правната комисија да не заседаваат, пратениците од мнозинството писмено да му вратат на министерот дека се согласуваат со него, и на крај претседателите на комисиите да потпишат извештај во којшто без дебата буџетот е завршен.
– Ако претседателите на комисиите тоа не сакале да го потпишат ќе го направеле мнозинството пратеници, пак, со писмо, изјави Ивановски според кого ова досега е вовед во најопасното сценарио.